السلام عليكم ورحمة الله وبركاته
رثاء في فقيد العضيان / خزام بن عدل العضياني
الذي وافته المنيه إثر حادث مروري يوم الاثنين 15 /8/1431 هـ
فى الدوادمي
.
.
.
البارحة جاني خبر موت ضرغام
فزيت من نومي وانا القلب ملهوف
علم ٍ يصحي كل من ناظره نام
ويزيد سهر اللي عن النوم مصروف
لا والله اللي ضافك الموت ياخزام
والموت حق وله مسايير وضيوف
ليت الأجل مهلك أعوام وأعوام
ونقول سوى بالعزيزين معروف
وليت الحزن في جونا كان ماحام
ولا لحق للكل من موتك حسوف
لكن هذا الموت هدام الأحلام
ياخذ من الدنيا قويين وضعوف
وحنا فقدنا اكرام من خيرة إكرام
روس الرجال اللي لهم فعل مشيوف
اقفت بهم سود الليالي والأيام
وأيامنا اللي مقبلة مصدر الخوف
وخزام رجل ً يالمواقيف مقدام
لاصار بالواقع مشاريه وظروف
له وقفة ٍ تشهد بها روس الأقلام
وله نخوة ٍ يسرح بها الفكر ويطوف
الطيب يلزمنا مع الطيّب الزام
ويبقى غلاه أن عاش وأن مات بالجوف
والمدح تاج ٍ للمشاكيل ووسام
والا الردي خله لاصوف ٍ ولاقوف
لو تجلبه للسوق مانباع مانسام
قدره رخيص وبالرياجيل معيوف
دنيا ترز أعلام وتنكس أعلام
تضحك وخافيها غرابيل وصدوف
ياغافل ٍ تبني حياتك بالأوهام
اصحى ترى عمرك بالأخطار محفوف
انهايتك حفرة وقطعة من الخام
حتيش لو تملك ملايين وآلوف
عمرك قصير ولوتمهلت مادام
لابد مايجري على شمسك اكسوف
.:: إعلانات موقع بوابة منتدى عتيبة ::. 
الإهداءات
رثاء في فقيد العضيان خزام
